Obama kutangaza kudhibiti silaha Marekani

Rais Obama anatarajiwa kutangaza mpango wa kuhakiki silaha katika masoko ya sihala hii leo wakati atakapotangaza mpango huo.

Akizungumza na waandishi wa habari baada ya kukutana na Mwanasheria Mkuu wa nchi hiyo amesema anataka kutumia mamlaka yake ya urais kwa sababu bunge la congress limeshindwa kushughulikia tatizo hilo.
" Habari njema ni kwamba sio tu ni mapendekezo yaliyo ndani ya mamlaka yangu ya kisheria kama rais lakini pia nina matumaini ni jambo llililopokelewa na wamerekani wengi wakiwemo wamiliki wa silaha, wanaounga mkono na wanaoamini. Kwa hiyo katika siku chache zijazo tutatekekeleza mpango huu, tutahakiksha watu wanaelewa tutakavyofanya mabadiliko haya na tutakavyotekeleza."
Rais Obama ametoa angalizo kuwa mpango usitarajiwe kuondoa silaha zote mikononi mwa wahalifu
" Japo ni lazima tuwe wazi kwamba hatua hii haitaondoa tatizo la makosa ya jinai katika nchi hii, wala haitaweza kuzuia mauaji ya watu wengi, wala hautaweza kuondoa kila silaha mikononi mwa wahalifu, kubwa utaokoa kwa kiasi kikubwa maisha ya watu katika nchi hii na kupungunza maumivu ya familia kuondokewa na wapendewa wao kulikosababishwa tna silaha zilizokuwa mikononi mwa watu wasio sahihi."

Matokeo ya mapema ya uchaguzi nchini Jamhuri ya Afrika ya Kati yanaonyesha Waziri Mkuu wa zamani Faustin Archange Touadera anaongoza.

Wagombea 30 walishiriki kwenye uchaguzi huo ambao huenda ukaingia kwa duru ya pili kati ya wagombea wawili watakaoongoza tarehe 31 Januari.
Bw Touadera hakupigiwa upatu kupata kura nyingi.
Alikuwa waziri mkuu kwenye serikali ya rais wa zamani Francois Bozize, aliyeondolewa madarakani 2013 na wapiganaji wa Kiislamu wa kundi la Seleka.
Upigaji kura ulifanyika tarehe 30 Desemba, walinda amani wa Umoja wa Mataifa wakilinda vituo vya kupigia kura.
CAR kwa sasa inaongozwa na kaimu rais Catherine Samba-Panza.
Bw Touadera, 58, alikuwa mhadhiri wa somo la hesabu chuo kikuu kabla ya kujiunga na siasa. Aliwania urais kama mgombea huru, bila kutumia chama chochote cha siasa.
Baada ya kura kuhesabiwa mji mkuu Bangui, yuko mbele sana ya mpinzani wake wa karibu Anicet Georges Dologuele, ambaye pia ni waziri mkuu wa zamani.
Kando na Bangui, kura nyingi hazijahesabiwa katika mikoa mingine ya CAR, sawa na za wakimbizi na raia wanaoishi nje ya nchi.
Bw Touadera ana zaidi ya kura 120,000 naye Bw Dologuele ana takriban kura 68,500.
Wa tatu ni Desire Kolingba, mwana wa rais wa zamani, tume ya uchaguzi imesema.
Wapiga kura 1.8 milioni walitarajiwa kushiriki kwenye uchaguzi huo.

Saudi Arabia yavunja uhusiano na Iran

Saudi Arabia imesitisha uhusiano wa kidiplomasia na nchi ya Iran na huku kukiwa na hali mbaya ya mvutano kufuatia utekelezaji adhabu ya kifo kwa mhubiri maarufu wa dini ya Kiislamu.

Waziri wa mambo ya kigeni wa Saudia, Adel al-Jubeir, ameishutumu serikali ya Iran kwa kusambaza silaha na kuanzisha jela na kuwafunga watu wanaodhaniwa magaidi katika ukanda wake .
Waziri huyo amesema wanadiplomasia wa Iran wanatakiwa kuondoka Saudia ndani ya saa arobaini.
Mwishoni mwa wiki iliyopita, waandamanaji mjini Tehran waliuvamia ubalozi wa Saudia mjini Tehran, huku wakilaani utekelezaji wa hukumu ya kifo kwa Sheikh Nimr al-Nimr na watu wengine 46.
Watu hao waliouawa inasadikiwa walikuwa na hatia ya makosa yanayohusiana na ugaidi.
Kiongozi mkuu wa Iran alimweleza Sheikh huyo kama shahidi ambaye alikuwa akitetea amani na kufanya maandamano ya amani.

CHANZO: BBC

Kundi la wapiganaji wa Kiislamu la al-Shabab kutoka Somalia limetoa kanda ya video ya propaganda ambapo wanamtaja mgombea urais wa Marekani Donald Trump.

Hii imejiri wiki kadha baada ya Trump, anayeongoza kinyang’anyiro cha kutafuta atakayepeperusha bendera ya chama cha Republican, kupendekeza Waislamu wazuiwe kuingia Marekani.
Kundi la al-Shabab, ambalo lina uhusiano na mtandao wa Al-Qaeda, linaelekeza ujumbe kwa Wamarekani weusi, likiwahimiza kusilimu na kushiriki kwenye Jihad au vita vitakatifu.
Kundi hilo linasema kwenye video hiyo kwamba ubaguzi wa rangi, ukatili wa polisi na chuki dhidi ya Waislamu vimesheheni Marekani.
Wasimamizi wa kampeni ya Bw Trump hawajazungumza lolote kuhusu video hiyo.
Miaka ya hivi karibuni, Wasomali-Wamarekani kutoka Minnesota wameripotiwa kwenda Somalia kujiunga na al-Shabab.

Afrika kujadili nafasi yake katika uchumi wa dunia

Mawaziri kutoka Mataifa 160 wanakongamana hii leo jijini Nairobi ikiwa siku ya kwanza ya Kongamano la Shirika la Biashara Dunani, WTO.

Ni mkutano wa kwanza ya aina yake barani Afrika.
Mjadala mkuu unatarajiwa kuwa mwelekeo mpya kwa mataifa ambayo hayajanawiri, hasa baada ya maafikiano ya Kongamano ka Doha kutotimizwa baada ya zaidi ya miaka kumi.
Zaidi ya wawakilishi 7,000 wanakongamana katika ukumbi wa mikutano ya KICC kuanzia hii keo kujadili jinsi ya kufanya biashara kote ulimwenguni kwa usawa.
Licha ya kuwa bara afrika lina wanachama wengi zaidi katika WTO, kumekuwa na malalamishi kuwa shirika hilo limetawaliwa sana na mataifa yalionawiri tayari, kama Uchina na Marekani.
Bwana Robert Azevedo , ambaye ni mkurugenzi Mkuu wa WTO, umuhimu wa WTO kwa wanachama kutoka afrika.
Naye akasema Afrika inapata Fursa ya kujieleza na kuweka bayana matakwa yake kibiashara. ''Afrika inapewa Meza ya kusema matarajio yake,
Mahala pa kuketi.
Kipaza sauti ya kusema nacho. Mataifa haya hayezi kupuuzwa.
Hayawezi kusahaulika.
Na hali hii huenda likatimika ikiwa WTO haitendi kazi yake vizuri, au haizingatii maswala yote muhimu, kama vile biashara ndogo ndogo na zile wastani, na vile zitawiana na msururu wa biashara za kimataifa.
Ni jinsi gani ya kusaidia mataifa ya Afrika kunawiri kiviwanda?
Njia bora zaidi ni kuyapa mataifa jukwaa ya kushiriki, kutoa maoni, na kusema ni njia gani tuwaweza kuwasaidia.''Alisema Azevedo
Kwa zaidi ya miaka ishirini shirika la WTO imefanya majadiliano bila kuafikiana jinsi mataifa masikini yatasaidiwa kufanya biashara.
Kwenye Kongamano la Doha ya Mwaka 2001, mataifa masikini yaliomba ruzuku katika biashara za sekta ya Kilimo wanayotegemea sana bila mafanikio.
Mataifa mengi sasa yanafanya makubaliano ya makundi madogo, kwa mfano jumuiya ya Afrika Mashariki au Muungano wa Kenya, Uganda na Rwanda, ambao umerahisisha usafiri wa raia wa nchi hizo pamoja na bidhaa kutoka bandari ya Mombasa.
Bw Azevedo anasema ni wakati wa WTO kuinuka sambamba na miungano kama hii.
Azevedo''Na hii ndio sababu kongamano la Nairobi ni muhimu sana. Ni wakati wa kutafakari, Nadhani wanachama watazungumza na kujadili maswala haya nyeti kama mawaziri, kwa hivyo ni mjadala muhimu kisiasa''
Azevedo hatarajii makubaliani katika maswala yote tata, ila ana matumaini kuwa mjadala utazua angalau msimamo mmoja kuhusu mwelekeo wa pamoja wa siku za usoni.
Kati ya mataifa arobaini na tatu kutoka Afrika ambayo ni washiriki wa WTO, 33 zinatambulika kama mataifa masikini, ikiwemo Tanzania, Uganda na Sudan Kusini.
Ethopia haijajiunga na WTO ingawa imewasilisha ombi. Katika kongamano la mwaka huu wanachama watapiga kura kuamua ikiwa mataifa ya Liberia na Afghanistan watakubaliwa kuwa wanachama.
Rais wa Liberia Ellen Johnson Sirleaf yuko Kenya kushuhudia uamuzi huo.

Polisi Tanzania wasaka mshukiwa wa sakata bandarini

Polisi nchini Tanzania wameahidi zawadi kwa atakayesaidia kukamatwa kwa mkurugenzi mtendaji wa kampuni moja anayetuhumiwa kuhusika katika kupitisha makontena bandarini bila kulipiwa kodi.

Kamanda kamishna wa polisi Suleiman Kova amesema wanamtafuta Abdulkadir Kassim Abdi, 38, ambaye ni Mkurugenzi Mtendaji wa kampuni ya Regional Cargo Services LTD.
Anashukiwa kuhusika katika kutoa makontena 329 kwenye bandari kavu ya Azam (Azam ICD) bila kulipia kodi.
Abdulkadir ni mmoja wa wakurugenzi wa kampuni zilitumiwa kutoa makontena hayo bandarini, kwa mujibu wa serikali.

• Magufuli avunja bodi ya bandari Tanzania

Polisi imetangaza zawadi nono ya takribani dola elfu 10 kwa atakayesaidia kupatikana kwa mtuhumiwa.
Makontena hayo 329 yaligundulika kukosekana kwenye ICD ya Azam kuanzia mwezi Julai hadi Novemba 2015.
Uchunguzi wa awali ulikuwa umeonyesha makontena 2489 yalitolewa Bandari ya Dar es Salaam kati ya Machi na Septemba 2014 kinyume cha taratibu kwa lengo la kukwepa kodi na ushuru.

Marekani yazitaka pande husika kuinusuru Burundi

Mjumbe maalum wa Marekani katika eneo la maziwa makuu amezitaka pande husika nchini Burundi kuafikiana ili kulinusuru taifa hilo ambalo linaelekea kuangamia na vita.

Thomas Perrielo alikuwa akizungumza na BBC baada ya wapiganaji kuvamia kambi moja ya kijeshi katika mji mkuu wa Bujumbura.
Amesema kuwa Burundi inaelekea kuwa taifa lililofeli .Amesema kuwa Marekani inaunga mkono vikosi vya kuleta amani kutoka mataifa jirani badala ya wanajeshi wa Umoja wa Mataifa.
Serikali imesema kuwa jeshi limewauwa wapiganaji 12 ambao walivamia kambi hiyo.Milio ya risasi pamoja na milipuko imekuwa ikisikika katika mji huo kwa saa kadhaa.
Wakati huohuo mashirika ya ndege ya Kenya Airways na RwandAir yamesitisha safari zake za kuelekea mji mkuu wa Burundi, Bujumbura, kufuatia makabiliano ya risasi mjini humo.
Kwa mujibu wa afisa mkuu wa mawasiliano wa shirika la ndege la Kenya, KQ, Wanjiku Mugo, safari hizo zimesitishwa kutokana na ukosefu wa wafanyakazi katika uwanja wa ndege wa Bujumbura.
Serikali ya Burundi imesema uwanja huo haujafungwa ila tu shughuli zimetatizika kwa sababu wafanyakazi hawakuweza kufika katika uwanja huo, kutokana na makabiliano makali ya risasi kati ya wapinzani wa serikali walioakuwa wamejaribu kuvamia kambi kadhaa za kijeshi mjini humo.
Shirika la kimataifa ya Msalaba mwekundu ICRC nalo kwenye Twitter limesema kuwa halikufanikiwa kuingia katikati mwa mji mkuu Bujumbura kutokana na vizuizi vilivyowekwa na maafisa wa jeshi ambao wanaendelea na msako dhidi ya watu wanaomiliki silaha.
Ripoti zinasema kuwa watu wanane wameuawa kwenye makabiliano hayo huku wengine wengi nao wakiwa wamejeruhiwa.
Mitaa ya Mutakula na Musaga ndiyo iliyoathirika zaidi huku wakaazi wa mitaa hiyo wakirpoti milio ya risasi kuanzia saa kumi alfajiri.
Huku hayo yakijiri Rais wa nchi hiyo Pierre Nkurunziza ameongoza mkutano wa baraza lake la mawaziriMsemaji wa rais Willy Nyamitwe amesema lengo la mkutano huo limekuwa kujadili bajeti ya serikali ya mwaka ujao.
Kuhusu makabiliano ya asubuhi, Bw Nyamitwe amesema kuwa watu wenye silaha walijaribu kuvamia kambi kadhaa za kijeshi, katika kile alichokitaja kama jaribio la kutaka kuwaachilia huru wafungwa.
Nyamitwe amesema kuwa juhudi hizo zimezimwa na Jeshi na kuwa hali ya utulivu imeanza kurejea.
Machafuko yalianza nchini Burundi Aprili mwaka huu, wakati rais Nkurunziza alipotangaza kuwa atawania muhula wa tatu kinyume na mkataba wa Arusha uliosainiwa zaidi ya muongo mmoja uliopita.
Umoja wa Mataifa umesema kuwa zaidi ya watu 200 wameuawa tangu machafuko hayo kuanza huku maelfu ya wengine nao wakikimbia nchi jirani.

Mbwa wa Benjamin Netanyahu huuma wageni

Mbwa ambaye anayefugwa na Waziri Mkuu wa Israel Benjamin Netanyahu aliwauma wageni wawili, akiwemo mbunge, katika hafla ya kidini.

Kisa hicho kilitokea katika hafla ya kuwasha michumaa kuadhimisha sikukuu ya Kiyahudi ya Hannukah nyumbani kwa Bw Netanyahu.
Mbunge huyo Sharren Haskel na mume wa Tzipi Hotovely, naibu waziri wa mashauri ya kigeni, hawakuumia sana.
Bw Netanyahu alimchukua mbwa huyo kwa jina Kaiya kutoka kwa kituo cha kuwaokoa wanyama waliotelekezwa mapema mwaka huu.
Waziri mkuu huyo alipakia kwenye Twitter picha yake akiwa na mbwa huyo wa umri wa miaka 10 mwezi Agosti.
"Ukitaka mbwa, tafuta mbwa aliyekomaa kutoka kituo cha kuwaokoa wanyama. Hutajuta,” aliandika.
Kaiya amekutana na wageni mashuhuri akiwemo Waziri wa Mashauri ya Kigeni wa Marekani John Kerry.

Trump aahirisha ziara yake ya Israel

Mgombea urais wa chama cha Republican Donald Trump amesema ameahirisha ziara yake aliyopangiwa kuifanya nchini Israel.

Mfanyabiashara huyo tajiri ameandika kwenye Twitter kwamba atafanya ziara hiyo “baadaye baada yangu kuwa Rais wa Marekani”.
Mapema wiki hii, Bw Trump alipendekeza Waislamu wazuiwe kwa muda kuingia Marekani.
Tamko lake lilishutumiwa vikali na viongozi duniani, akiwemo Waziri Mkuu wa Israel Benjamin Netanyahu.

• Trump: Sitaacha kuwania urais Marekani
• Mambo 20 makuu anayoamini Donald Trump

Matamshi hayo ya Trump lingetia utata kwenye ziara hiyo upande wa kiongozi huyo wa Israel, ambaye hangetaka kuwaudhi Waislamu.
“[Bw Netanyahu] alisema tutakuwa na mkutano na anasubiri kwa hamu mkutano huo na mengine mengi. Lakini sikutana kumuwekea shinikizo,” Bw Trump aliambia Fox News mnamo Alhamisi.
Pendekezo lake alilitoa baada ya shambulio lililoua watu 14 mji wa San Bernardino, jimbo la California, ambalo lilitekelezwa na wanandoa Waislamu waliokuwa na itikadi kali.

Rais wa Argentina awaaga raia wake

Rais wa Argentina aliyemaliza muda wake , Cristina Fernandez de Kirchner, amewaaga maelfu ya wafuasi wake ambao walikusanyika katikati mwa mji wa Buenos Aires.

Katika hotuba yake ambayo ilijaa hisia nje ya ikulu, Fernandez alivishutumu vyombo vya habari vya nchi hiyo kwa kuipiga vita serikali yake ya mrengo wa kushoto.
Fernandez na mume wake ambae tayari ameaga dunia, Nestor Kirchner, wamekuwa madarakani kwa muda wa miaka kumi na mbili.
Ametetea hali ya uchumi, na kusema hakuna katika utawala uliopita ambao uliiacha Argentina bila madeni.
Na kuwataka raia wa Argentia kutetea haki zao na maslahi yao ambayo wameyapata.
Makundi yaliyokusanyika katika eneo hilo yalikuwa yakiimba wakati Fernandezi akipanda katika jukwaa.

Nyota wa Hollywood ‘kuhamia Afrika’ Trump akishinda

Nyota wa Hollywood Samuel L Jackson atahamia Afrika Kusini iwapo Donald Trump atashinda uchaguzi wa urais Marekani, tovuti ya News 24 imeripoti.

Trump, mmoja wa wanaowania tiketi ya kugombea urais Marekani kupitia chama cha Republican, ameshutumiwa vikali baada ya kupendekeza Waislamu wazuiwe kuingia Marekani.
Haijabainika iwapo matamshi ya mwigizaji huyo, yaliyopeperushwa kwenye sehemu ya kipindi cha Jimmy Kimmel Live iliyorekodiwa awali Jumatatu, yalitolewa kabla au baada ya matamshi hayo ya majuzi zaidi kutoka kwa Trump.

• Trump akemewa kwa kutaka Waislamu wasiingie Marekani

Bw Trump, wakati mmoja amewahi kunukuliwa akikosoa kundi linalotetea haki za watu weusi Marekani la Black Lives Matter.

Rais Magufuli kaandikwa tena na tovuti ya gazeti la Uingereza, ni kuhusu Dec 9.

Sasa hivi sio habari mpya tena kuona gazeti au mtandao wa nchi flani maarufu duniani limemuandika Rais Magufuli wa Tanzania, tayari mpaka sasa tumeshaona Magazeti ya Australia, South Africa, Zimbabwe, Kenya, China, Uganda na Uingereza yamemuandika Dr. Magufuli.
December 9 2015 baada ya Rais Magufuli kuchukua headlines za yeye kufanya usafi, The Telegraph (telegraph.co.uk) wameandika mistari ambayo inaonyesha kabisa kitendo cha Dr. Magufuli kuingia mtaani kufanya usafi kimewagusa na ni tofauti na Waziri mkuu wa Uingereza ambaye sio rahisi kumuona au kufanya alichofanya Dr. Magufuli.
Kwenye sehemu ya stori yenyewe wamenukuu mistari ya Rais Magufuli kusema ni aibu kusherehekea siku ya uhuru Tanzania wakati nchi ina Wagonjwa wa kipindupindu ambapo kwenye taarifa hiyo ziliambatanishwa picha zikimuonyesha Rais JPM akifanya usafi.

Mawaziri waidhinisha kura ya muda wa rais Rwanda

Baraza la mawaziri Rwanda limeidhinisha kufanyika kwa kura ya mamuzi kuhusu marekebisho ya katiba yatakayomruhusu Rais Paul Kagame kuendelea kukaa madarakani.

Kikao cha baraza la mawaziri kimetangaza kuwa kura ya maamuzi kuhusu katiba hiyo mpya itafanyika tarehe 18 Desemba, ambayo ni Ijumaa wiki ijayo, kwa wananchi wa Rwanda na tarehe 17 kwa raia wa Rwanda wanaoishi ng’ambo.
Tangazo hilo la baraza la mawaziri limethibitisha pendekezo lililotolewa na wa mkutano mkuu wa chama tawala RFP mwishoni mwa wiki iliyopita wa kufanyika kwa kura hiyo haraka iwezekanavyo.
Marekebisho ya katiba tayari yamekwisha idhinishwa na bunge la Rwanda.
Kulingana na katiba mpya, Rais Paul Kagame baada ya kumaliza muhula wake mwaka 2017, atakuwa huru kugombea muhula wa tatu ambao utakuwa wa miaka 7 na baadaye kuruhusiwa tena kugombea mihula mingine miwili, kila mmoja ukiwa wa miaka 5.
Katiba iliyokuwepo ilikuwa inaweka ukomo wa mihula miwili pekee madarakanMarekebisho ya katiba nchini Rwanda yamekwisha pingwa na baadhi ya nchi wafadhili wa taifa hilo kama vile Marekani, Uingereza na umoja wa nchi za ulaya kwa madai kuwa marekebisho hayo yanakandamiza demokrasia.
Hata hivyo, akijibu shutuma hizo, Rais Paul Kagame alisema kuwa kilichotokea nchini humo ni matakwa ya wananchi ambao bila shaka watapewa haki ya kudhihirisha hivyo kupitia kura ya maamuzi.

Rais Magufuli na waziri mkuu Majaliwa waongoza Watanzania kufanya usafi

Mamia ya watu walirauka na kuanza kusafisha baadhi ya maeneo ambayo hujulikana sana kwa kuwa na uchafu na taka kwa wingi. Mwandishi wa BBC Sammy Awami aliwapata wachuuzi na maafisa wa baraza la jiji Dar es Salaam asubuhi na mapema wakifanya usafi katika soko maarufu la Kariakoo.

Mwandishi wa BBC Tulanana Bohela anasema Waziri Mkuu Kassim Majaliwa pia amefika soko hilo la Kariakoo. Rais John Magufuli naye amekuwa kwenye aneo la ufuo wa bahari karibu na ikulu akiwa amevalia glavu. Katika eneo la Mwenge, wananchi pia wanajizatiti kufanya usafi. Mwandishi wa BBC Regina Mziwanda amewapata wananchi hawa wakiteketeza takataka baada ya kuzikusanya pamoja.

Kongozi mmoja wa kundi la Al Shabaab ameuawa katika shambulizi la ndege ya Marekani

Msemaji wa makao makuu ya ulinzi ya Marekani ,Peter Cook , kifo cha Abdirahman Sandhere ni pigo kubwa kwa usimamizi na uwezo wa mashambulizi ya kundi hilo linalounga mkono wanamgambo wa Al Qaeda.

Sandhere, anayejulikana pia kama " Ukash'' anadaiwa kuuawa Jumatano iliyopita. Al Shabaab inaendesha kampeini ya kuing'oa madarakani serikali inayoungwa mkono na jamii ya kimataifa ilikilindwa na zaidi ya majeshi 22,000 wa umoja wa Afrika. Kundi hilo limedhibitiwa katika maeneo mengi iliyokuwa ikikalia.

Hata hivyo kuwepo kwake na tishio la amani imedhihirika kupitia mashambulizi ya kigaidi mjini Mogadishu na vilevile katika taifa jirani la Kenya ambapo wapiganaji wake wametekeleza mashambulizi chungu nzima na kusababisha maafa makubwa.

Kwa mujibu wa duru za ujasusi za Marekani Al Shabaab inakabiliwa na changamoto kwa sababu ya ushawishi mkubwa wa Islamic State na Al Qaeda. Marekani imekuwa ikitekeleza mashambulizi ya ndege zisizokuwa na rubani kuanzia mwaka wa 2011.

Filamu ya uchumba wa Obama kutolewa 2016

Filamu ya ucheshi kuhusu mkutano wa kwanza wa kuchumbiana kati ya Barack Obama na Michelle ni miongoni mwa filamu ambazo zitaonyeshwa kwenye maonyesho ya filamu ya Sundance 2016.

Filamu hiyo kwa jina Southside With You inaigiza yaliyojiri adhuhuri moja majira ya joto 1989 pale Obama alipomchumbia mkewe wa baadaye Michelle Robinson, mjini Chicago.
Filamu nyingine zitakazoonyeshwa ni Swiss Army Man, ambapo mwigizaji mashuhuri Daniel Radcliffe anaigiza kama maiti.
Makala ya 2016 ya maonyesho ya Sundance yatafanyika 21 hadi 31 Januari katika Park City, Utah.
Maonyesho hayo yaliasisiwa na mwigizaji Robert Redford.
Tika Sumpter anaigiza Michelle naye Parker Sawyers Bw Obama.

Uchina kutoa dola bilioni 60 kwa Afrika

Rais wa Uchina Xi Jinping amesema taifa lake litatoa ufadhili wa dola bilioni 60 kwa nchi za Afrika.

Tangazo hilo amelitoa kwenye mkutano mkuu wa ushirikiano kati ya Uchina na nchi za bara Afrika, ambao umeanza leo jijini Johannesburg. Viongozi kadha wa mataifa ya Afrika wanahudhuria.
Tangazo la fedha hizo za mabilioni ya dola ambazo zitatolewa kupitia ruzuku, mikopo na ufadhili wa miradi ya maendeleo lilisubiriwa, lakini kiasi cha fedha kilichoahidiwa kimezidi matarajio, mwandishi wa BBC aliyeko Afrika Kusini Karen Allen anasema.
Sehemu kubwa ya usaidizi huu wa kifedha sana utatolewa kupitia miradi ya miundo mbinu, kusaidia kusisimua ukuaji wa kiuchumi, lakini maelezo zaidi hayajatolewa.
Kiongozi mwenza wa mkutano huo Rais wa Afrika Kusini Jacob Zuma amesifu ushirikiano kati ya Uchina na nchi za Afrika.
Amesema watu wanaoishi Uchina na Afrika ni theluthi moja ya watu wote duniani, na kwamba hilo ni soko kubwa la bidhaa.
Uchina, nchi yenye uchumi wa pili kwa ukubwa duniani, imetoa msururu wa mikopo kwa nchi za Afrika, ambazo nazo huuzia taifa hilo mafuta na bidhaa nyingine muhimu.
Hata hivyo, idadi ya bidhaa ambazo mataifa hayo huuzia Uchina imekuwa ikipungua.
Uwekezaji wa Uchina Afrika ulishuka asilimia 40 nusu ya kwanza ya mwaka huu, kwa mujibu wa wizara ya uchumi ya Uchina.
Ziara ya Bw Xi barani Afrika imetazamwa na wengi kama hatua ya kuyahakikishia mataifa ya Afrika kwamba Uchina itaendelea kuwekeza katika bara hilo licha ya kupungua kasi kwa ukuaji wa uchumi wa Uchina.
Mapema wiki hii Uchina na Afrika Kusini zilitia saini mikataba na mikopo ya thamani ya $6.5bn (£4.3bn), inayoangazia zaidi miundo mbinu.
Jumla ya mikataba 26 ilitiwa saini Jumatano, $2.5bn zikienda kwa shirika la reli la serikali.Kabla ya kutua Afrika Kusini, Bw Xi alizuru Zimbabwe Jumanne, ambako pia aliahidi taifa hilo mikopo ya kusaidia kuinua uchumi wake uliodorora.

Kasi ya Rais Magufuli Haiko Kwenye Makontena Bandarini tu, imepita na TFF Ambapo TRA Imesitisha Safari Ya Timu Ya Taifa Ya Vijana

Ikiwa bado siku moja Rais wa Jamuhuri ya Muungano wa Tanzania Dk John Pombe Magufuli atimize mwezi mmoja toka aapishwe kuwa Rais wa awamu ya tano wa Jamuhuri ya Muungano wa Tanzania, tumeshuhudia mengi yakitokea katika suala zima la upambanaji na watu wanaokwepa kodi sambamba na kusimamishwa kazi kwa viongozi kadhaa wa mamlaka ya mapato Tanzania (TRA) waliopo Bandarini.

December 4 kasi ya Rais John Pombe Magufuli inaonekana kuwashitua viongozi wa mamlaka ya mapato Tanzania (TRA), kwani wameanza harakati za kuwaadhibu watu wanaodaiwa kodi.

Juma lililopita Shirikisho la Mpira wa Miguu Tanzania (TFF) liliaga timu ya Taifa ya Vijana Chini ya umri wa miaka 15 (U15) ikianza ziara yake ya Afrika Mashariki kuanza kucheza na Burundi mjini Kigoma na baadaye Kigali, Rwanda, Kampala, Uganda na mwisho Nairobi Kenya.

Bahati mbaya ziara hiyo itaishia Mwanza na Kigoma kufuatia Mamlaka ya Mapato Tanzani (TRA) kuizuia account ya shirikisho la mpira wa miguu Tanzania (TFF) kwa kushindwa kulipa kodi ya Tsh bilioni  1,637,334,000 (bilioni 1.6 tshs) ikiwa ni kodi kwa kipindi cha 2010 – 2013

Sehemu kubwa ya kodi hiyo ni makato kwenye mishahara (PAYE) ya walimu wa kigeni, Jan Poulsen, Kim Poulsen na Jacob Michelsen na vilevile kodi ya ongezeko la thamani (VAT) kwenye mchezo wa Timu ya Taifa (Taifa Stars) dhidi ya Brazili uliofanyika mwaka 2010.

Walimu wa Timu za Taifa wamekuwa wakilipiwa mishahara na Serikali na hivyo TFF haikuwajibika kuwakata kodi. Aidha, mchezo kati ya Tanzania na Brazil ulisimamiwa na kamati maalum ya Serikali na fedha zake hazikuingizwa katika akaunti za TFF.

Kutokana na hatua hii ya TRA shughuli nyingine za mpira zitakazohathirika  ni:

1. Kulipia madeni ya usafiri, chakula na posho za Timu za Taifa zilizoshiriki mtoano wa kombe la Dunia na mashindano ya Afrika Mashariki na Kati (Challenge Cup)

2. Program za mpira wa Wanawake na vijana zitalazimika kusimama.

3. Mashindano ya kombe la Shirikisho raundi ya pili iko kwenye hatihati kwani hakuna fedha za kugharimia michezo hiyo.

4. Mashindano ya Ligi Daraja la Pili (SDL) inayoendelea yatalazimika kusimama vilevile. Mashindano haya TFF imekuwa ikiyaendesha bila mdhamini.

5. Vifaa vya michezo (Mipira) kwa ajili ya shule za msingi na vituo vya maendeleo (Regional Football Development Centres) vinatarajiwa kuwasili nchini wakati wowote na TFF haitakuwa na uwezo wa kulipia usafirishaji na ushuru wake.

6. Malipo ya gharama za kambi na karo kwa ajili ya vijana wa timu ya Taifa ya vijana chini ya miaka 13 walioko shule ya Alliance Academy ya jijini Mwanza.

7. Huduma za kiutawala ikiwa ni pamoja na utunzaji viwanja na majengo, maji, umeme, ulinzi pamoja na mishahara na stahiki nyingine za wafanyakazi

8. Mwelekeo na mwitikio mzuri wa wadhamini uko kwenye hatari ya kupotea pindi mashindano na shughuli wanazozidhamini zitakapofubaa au kusimama kabisa.

9. Mkutano Mkuu wa kawaida wa Shirikisho la Mpira wa Miguu (TFF) wa Mwaka 2015 uliopangwa kufanyika Tanga 19-20 Desemba 2015 sasa una hatihati ya kuweza kufanyika.

Hata hivyo, kwa kutambua umuhimu wa ulipaji kodi na wajibu wa Mamlaka ya Mapato katika kuhakikisha kodi inakusanywa kwa ajili ya ustawi na maendeleo ya Taifa,TFF ipo katika mawasiliano na TRA katika kutafuta ufumbuzi wa kudumu wa suala hili ikiwa ni pamoja na kupitia upya mahesabu ili kujua wajibu halisi (net liability) wa TFF na namna ya kulipa au kulipwa kutegemea ulali wa mahesabu.

Kwa taarifa hii TFF inaomba utulivu kwa wanamichezo wote pamoja na ushirikiano wa karibu kutoka katika vyombo vyote husika ikiwemo TRA na wadau wengine ili jambo hili lipate ufumbuzi wa kudumu utakaoleta tija kwa serikali ya awamu ya tano ikiwa ni pamoja na kuongeza uwekezaji katika maendeleo ya mpira wa miguu na michezo kwa ujumla wake.

Kizza Besigye akamatwa Uganda

Kiongozi wa chama cha upinzani cha Forum for Democratic Change (FDC) nchini Uganda, Kizza Besigye amekamatwa pamoja na wanachama wengine wa chama chake.

Kukamatwa kwao kunajiri wakati ambapo chama hicho kilikuwa kinaanza kampeni zake kwa uchaguzi mkuu wa mwaka ujao kulingana na mwandishi wa BBC Patience Atuhaire katika mji mkuu wa Kampala.
Watu wengine wawili pia walikamatwa pamoja na bwana Besigye wakati maafisa wa polisi walipovamia nyumba yake mapema leo kulingana na vyombo vya habari.
Mbunge wa chama hicho Ssemujju Nganda ambaye pia ni msemaji wa chama hicho pia alikamatwa nyumbani kwake na amepelekwa katika kituo cha polisi cha Naggalama,karibu na mji mkuu wa Kampala.
Besigye amepoteza mara tatu kwa rais Yoweri Museveni katika uchaguzi uliokumbwa na utata.

Upinzani wapinga matokeo ya uchaguzi Guinea

Kiongozi wa chama kikuu cha upinzani nchini Guinea amejiondoa katika uchaguzi uliofanyika nchini humo akisema kuwa kulikuwa na udanganyifu mkubwa uliotekelezwa na serikali kulingana na kiongozi wake wa kampeni.

Uamuzi huo wa Cellou Diallo wa kujiondoa unajiri wakati ambapo matokeo yanaonyesha kwamba rais Alpha Conde anaongoza kwa wingi wa kura akitafuta kushinda awamu ya pili ya miaka mitano.
Wachunguzi kutoka muungano wa Ulaya wanasema kuwa uchaguzi huo ulikuwa wa haki licha ya matatizo makubwa ya vifaa.
Matokeo kamili ya uchaguzi huo yanatarajiwa mwishoni mwa wiki hii.