USAJILI HUU UTAMALIZA KIU YA SIMBA SC?

Mabadiliko si ‘ kitu cha kuhesabu’, lakini mengi yanatokea. Yoote husababishwa na ‘ Kiu’, ikiwa Azam FC walikuwa na kiu ya kutwaa ubingwa wa kwanza wa Tanzania Bara, Simba SC, Yanga SC wao pia walikuwa na kiu ya kutaka kuongeza mafanikio zaidi ya ndani ya uwanja kwa ushindi wa mataji kila msimu. Kiu si kitu cha kuburudika au kuondoka, Iliumbwa sababu ya Uhai, na itaondoka sababu ya uhai. Kiu gani wanayo klabu kubwa kama Simba Sc?

Tuachane na ukweli kuwa klabu hii ( Simba SC) ni mabingwa mara 19 wa Kihistoria wa ligi kuu ya Bara, timu hiyo kwa sasa imekuwa na –u-haba’ wa mataji ya ligi kuu na kile cha kusikitisha zaidi kwa wapenzi wa klabu hiyo ni kukosa kuwa miongoni mwa klabu Mbili za juu kwa msimu mitatu mfululizo. Kiuhalisia nafasi ya Simba hivi sasa imechukuliwa na Azam FC ambayo ndani ya misimu minne mfululizo timu hiyo ya Chamanzi imemaliza namba 2 mara tatu na mara moja wamefanikiwa kushinda ubingwa.

Siku zinapita, lakini Simba wanaendelea kuhangaikia ‘ Kiu Yao’ ya kurudi miongoni mwa klabu mbili bora za Bara na hata kushinda ubingwa wa kwanza tangu walipofanya hivyo mara ya mwisho msimu wa 2011/12. Simba wanashindwa kuiangamiza kiu, lakini Kiu hiyo imekuwa ikiwaangamiza kwa miaka mitatu mfululizo. Je, wataishinda Kiu hiyo msimu ujao?

USAJILI……

Achana na usajili ulio mbioni kukamilika wa wachezaji Mreno, Ricardo de Andrade ambaye ni mchezaji wa nafasi ya u-golikipa,Mshambulizi Mmali, Makan Dembele, Straika Mrundi, Kevin Ndayisenga ambao wataungana na Waganda, mlinzi wa kati, Juuko Murishid, kiungo, Simon Sserunkuma na mshambulizi Hamis Kizza na Mzimbabwe, Justice Majabvi ambaye ana uwezo wa kucheza nafasi ya ulinzi na ile ya kiungo.

Nyota hawa saba wa kimataifa wanatazamwa kwa jicho la ‘ ukombozi’ wakichanganyika na sehemu ya timu iliyoandaliwa takribani miaka mitatu iliyopita. Katika misimu mitatu ya mwisho kuelekea msimu wa 2015/16, Simba imefanya usajili wa wachezaji wengi wa Kimataifa lakini tuseme ukweli ni Emmanuel Okwi pekee ambaye amejitahidi kuisaidia klabu hiyo, pia mchango binafsi wa mshambulizi Mrundi, Amis Tambwe msimu wa 2013/14 utaendelea kukumbukwa.

Okwi alikuwa na matatizo ya nje ya uwanja-Kuchelewa kurejea klabuni kila alipopewa ruhusa ya kwenda kwao lakini aliporejea na kupewa nafasi ya kucheza alikuwa bora kuliko. Kama usajili huu Utalipa kwa Simba wanaweza kufanya vizuri na kukata kitu yao licha ya kwamba hawataimaliza. Nyota wa kimataifa wamekuwa na mchango mkubwa kwa klabu za Azam FC na Yanga SC katika kipindi cha misimu mitatu iliyopita lakini kwa Simba wamekosa utulivu na wengi licha ya kusajiliwa kwa matarajio makubwa hushindwa na kuondoolewa mapema.

NYOTA WAPYA WENYE UZOEFU……

Mashabiki wa Yanga SC wanasema Musa Hassan Mgosi ni ‘ Mzee’, lakini sivyo, kama Musa atajibidiisha anaweza kuwa mfungaji bora wa muda woote wag emu za ‘ Dar es Salaam derby’. Mgosi amekwisha funga mara nne katika mipambano ya Simba na Yanga na msimu wa mwisho alifunga mara mbili katika ushindi wa Simba 4-2 Yanga, April, 2011. Simba wenyewe hawana shaka kuhusu Musa kwa kuwa hivi sasa ni mchezaji anayepevuka zaidi kiakili, kiuchezaji na nidhamu.

Kitendo cha kupewa u-nahodha wa klabu hiyo kwa mara nyingine kitachochoea uwezo wake na ataendelea kufunga mabao muhimu hata kama hatooshinda tena tuzo ya ufungaji bora kama alivyofanya misimu mitano iliyopita. Mgosi anaungana na kijana Daniel Lyanga kama maingizoo mapya ‘ wazawa’ katika safu ya mashambulizi. Bila shaka wataziba nyufa hizo vizuri sambamba na washambuaji wapya waliosajiliwa kutoka ng’ambo ya nchi.

Peter Mwalyanzi ni mchezaji wa nafasi ya kiungo wa mashambulizi, huyu ana uwezo wa kucheza kama wing pia. Ni mchezaji mwenye kasi na mzuri katika kumiliki mpira, alicheza vizuri kiasi katika pambano dhidi ya SC Villa ya Uganda siku ya Jumamosi iliyopita na alionesha kuwa Simba haikukosea kumsaini kutoka Mbeya City FC. Mlinzi wa kati, Mohamed Fakhi na Yule wa pembeni Samih Hajji Nuhu pia wameongezwa kuongeza namba ya walinzi.

Usajili huu unaweza kutosheleza kiu ya klabu, mashabiki na wapenzi?. Chini ya mwalimu raia wa Uingereza, Dylan Kerry na wasaidizi wake, Suleimani Matola ( koocha msaidizi),  Idd Salim ( kocha wa magolikipa) na mtaalamu wa mazoezi ya viungo, Mromania,  Momeilovic Dusan timu hiyo haitashindwa kirahisi msimu ujao kwa kuwa utawala umeonekana kuwa makini katika usajili na uboreshaji wa benchi la ufundi. Nyota wapya na timu mpya ya ufundi wanaweza kushilikiana vizuri na nyota waliowakutana na kutengeneza ‘ sura ya matumaini’.

Simba haijakosea kumsaini kwa mara ya pili kiungo Mwinyi Kazimoto kwa kuwa timu ilihitaji wachezaji wazoefu wenye uwezo kama Mwinyi, Mgosi, Kizza na wengineo. Nafikiri Ingizo la Lyanga litageuka kutoka usajili wa kawaida hadi kuwa mchezaji muhimu. Kwa usajili Simba hawajakosea sana wamejitahidi kwa kiasi cha kuridhisha.

WACHEZAJI VIJANA……..

MANYIKA Peter Jr, Hassan Kessy, Mohamed Hussein ‘ Tshabalala’, nahodha msaidizi Hassan Isihaka, Juuko, Abdi Banda, Said Ndemla, Jonas Mkude, Simon, Ibrahim Ajib ni baadhi ya wachezaji vijana watakao endelea kuichezea klabu hiyo msimu ujao. Simba ilisemwa kutokuwa na uzoefu wa wachezaji hao katika ligi kuu ndiyo kumesababisha washindwe kufanya vyema katika ligi kuu na wao walichukulia kama sababu ya kuficha udhaifu wa timu ndani ya uwanja.

Je, nyota hawa vijana ambao wanakwenda kucheza msimu wan ne katika ligi kuu watakuwa wamejifunza na kujiongezea mbinu na maarifa zaidi ili kuisaidia klabu yao msimu ujao?. Ibrahim Twaha, Abdallah Seseme, Ramadhani Singano, Okwi, Elius Maguli, Hussein Sharrif, William Lucian ni baadhi ya vijana ambao wameondooka klabuni msimu huu ili kupisha wachezaji wapya wenye uzoefu.

Kundi la vijana kina Isihaka ni lazima sasa wawe na kiu ya kushinda ubingwa wa Tanzania Bara kwa kuwa kutofanya hivyo msimu ujao klabu itakuwa imekaa kwa miaka minne mfululizo pasipo kushinda ubingwa huo. Simba iliwahi kusubiri kwa miaka minne kushinda ubingwa wa kwanza wa ligi kuu. Kati ya 1996 hadi mwaka 2000 timu hiyo ya ‘ Mtaa wa Msimbazi’ iliishi bila kushinda ubingwa wa ligi.

Sasa hakuna tena kisingio cha ukosefu wa uzoefu, Simba watapaswa tu kupiga na kushinda moja ya nafasi mbili za juu na wachezaji vijana wanatakiwa kusahau kuhusu umri wao na kucheza kwa malengo ya kushinda tu.

HOFU…….

Baada ya kuwaajiri walimu wa kutosha katika benchi la ufundi, labda sasa utawala unapaswa kujirekebisha na tatizo lao la mar azote-Kuingilia na kushinikiza maamuzi yao kwa benchi la ufundi. Makocha wooote wa klabu hiyo wamekuwa wakilalamikia hali hiyooo mara baada ya kufukuzwa lakini afadhali kwa Mserbia, Goran Kopunovic ambaye alionekana kuwa huru katika kazi yake.

Simba itafanikiwa kumaliza kiu mojawapo ( kumaliza nafasi ya pili au kushinda ubingwa) ikiwa tu wachezaji watajituma, watacheza kwa usikivu na kufuata maelekezo ya benchi la ufundi. Kiu ya mafanikio imewaganda mashabiki na wapenzi wa klabi hiyo. Kiu hii itamalizwa kama kila mtu atafanya kazi yake kwa uhuru, vinginevyo Azam FC na Yanga SC zitaendelea kutawala nafasi mbili za juu